3 batang estudyante naligo sa ilog, patay!

BULAN, Sorsogon, Philippines — Magkakasamang nasawi ang tatlong batang mag-aaral matapos na malunod sa paliligo sa ilog sa pagitan ng Brgy. J. Abad Santos at Brgy. San Juan Bag-o, Bulan, Sorsogon kamakalawa ng tanghali.

Umabot ng ilang oras bago nahanap at naihaon ng mga responders ang mga biktima na sina alyas “Alma” at “Nilda”; kapwa 8-anyos at Grade 3 pupil, at “Maricris”, 9-anyos, Grade 4 pupil; pawang residente ng naturang lugar.

Sa ulat, pasado alas-10 ng umaga kasama ang ilan pang mga kalaro ay magkakasamang nagtungo ang mga biktima sa ilog upang maligo.

Gayunman, napunta ang tatlo sa malalim na bahagi ng ilog at nakita ng mga kasama na nalulunod kaya mabilis silang kumuha ng kahoy na makakapitan sana ng mga biktima.

Sa lakas ng agos ng tubig ay hindi na kinaya ng mga biktima at parang tuluyan silang hinila pailalim ng tubig.

Dahil dito, mabilis na humingi ng tulong sa mga residente at opisyal ng barangay ang mga kasama at nagtulung-tulong sa paghanap kina Alma, Nilda at Maricris.

Hapon na nang matagpuan ang walang malay na mga biktima at agad isinugod sa pinakamalapit na pagamutan kung saan lahat sila ay idineklarang patay na.