1 pang barangay chairman todas sa ambush!
![1 pang barangay chairman todas sa ambush!](https://media.philstar.com/photos/2024/08/20/2_2024-08-20_22-54-32.jpg)
COTABATO CITY, Philippines — Isa na namang barangay chairman sa Central Mindanao ang napatay sa pamamaril, isang araw lang makalipas ang pag-ambush at pagpatay sa isa pang tserman at misis nito na nagsisilbing barangay secretary.
Naganap ang pananambang na nagsanhi ng agarang kamatayan ni Amado Serra, Jr., chairman ng Barangay Laguilayan sa Isulan, Sultan Kudarat sa Region 12, nitong hapon ng Lunes.
Sa mga inisyal na ulat nitong Martes ng Police Regional Office-12 at ng Sultan Kudarat Provincial Police Office, minamaneho ni Serra ang kanyang kotse nang siya ay paputukan ng mga lalaking sakay ng mga motorsiklo na nakabuntot sa kanya, habang nasa isang bahagi ng kalye sa Purok 7 sa Barangay Laguilayan.
Nauna rito, napatay sa ambush nitong gabi ng Linggo, August 18, 2024, si Esmael Latip Mustapha, chairman ng Barangay Bulibod sa Sultan Kudarat, Maguindanao del Norte, sakop ng Bangsamoro region, at ang kanyang misis na si Rahima.
Naglalakad sina Mustapha at ang kanyang kabiyak sa isang kalye sa Barangay Bulibod nang pagbabarilin ng assault rifles ng mga armadong lalaki na inaalam pa ng mga imbestigador ng Police Regional Office-Bangsamoro Autonomous Region ang pagkakakilanlan at kung anong grupo upang masampahan ng kaukulang mga kaso.
Patuloy ang imbestigasyon ng pulisya kung may kinalaman sa pulitika at nalalapit na halalan ang magkasunod sa insidente ng pananambang at pagpatay sa naturang mga barangay chairman.
- Latest