Raid nauwi sa barilan sa Batangas
CAMP VICENTE LIM, Laguna, Philippines — Pinagbabaril ang isang hinihinalang contract killer habang dalawa sa arresting team ng pulisya ang sugatan sa pagpapatupad ng arrest warrant na nauwi sa putukan sa Barangay Bulsa, San Juan, Batangas, noong Linggo ng umaga.
Kinilala ng pulisya ang napatay na akusado na si alyas “Ambet”, miyembro ng gun-for-hire ring na sangkot din sa gunrunning activities hindi lamang sa Calabarzon kundi maging sa buong bansa.
Napatay si Ambet sa lugar habang dalawang pulis- isang Staff Sergeant at Executive Master Officer, ang nasugatan at isinugod sa pinakamalapit na ospital. Parehong nasa stable na kondisyon ang dalawa.
Sa ulat, ang arresting team ay armado ng dalawang arrest warrant para sa paglabag sa RA 8294 at RA 9516 na inisyu ni Judge Marie Manalang-Austria, na may petsang Jan. 26. 2023 nang isilbi nila ang ito laban sa akusado.
Sa halip na sumuko, bigla umanong pinaputukan ng suspek ang mga operatiba, na nagdulot ng 10 minutong engkuwentro na ikinabulagta ng una at ikinasugat ng dalawang pulis.