CAVITE, Philippines — Arestado ang magtatay na tulak ng droga matapos ang inilatag na buy-bust operation ng pulisya kamakalawa ng hapon sa Brgy. Granados, Gen Mariano Alvarez, dito sa lalawigan.
Kinilala ng pulisya ang mag-amang suspek na sina Robert White alias “Bobby” at anak nitong si Robert White Jr, kapwa residente sa nasabing lugar at nasa street drug watchlist ng pulisya.
Sa imbestigasyon ni Police Sergeant Jervie San Pascual, may hawak ng kaso, alas-2:25 ng hapon nang ilatag ng GMA Police ang buy-bust laban sa mag-ama.
Halagang P300 na shabu ang binili ng isang police poseur buyer sa mag-amang suspek. Nang iabot na ang biniling shabu ay dito na dinakma ng grupo ang mga suspek.
Narekober sa mag-amang suspek ang may 0.20 gramo ng shabu at buy-bust money na ginamit sa operasyon.