MANILA, Philippines — Patay ang hepe ng Tubao Municipal Police Station (MPS) matapos ang salpukan ng dalawang sasakyan kamakalawa ng hapon Bacnotan, La Union.
Dead-on-arrival sa Bacnotan District Hospital si Police Major John Maynard Macusi, 32, dahil sa tinamong grabeng pinsala sa ulo at katawan habang sugatan ang kabanggaan nitong drayber ng Toyota Fortuner na nakilalang si Avelino Ledda Anastacio Jr., 29. Ligtas naman ang dalawang sakay ni Anastacio.
Sa ulat ng pulisya, naganap ang insidente pasado alas-2:00 ng hapon nitong Martes sa kahabaan ng national highway sakop ng Barangay Guinibang ng nasabing bayan.
Nasa magkabilang lane sina Macusi na lulan ng kulay gray na kotse at Anastacio na nagmamaneho ngToyota Fortuner nang pagsapit sa nasabing lugar ay nagkaroon ng malakas na head on collision ang dalawang sasakyan.
Sa lakas ng banggaan, halos mawasak ang harapang bahagi ng kotse ni Macusi gayundin ang sasakyan na minamaneho ni Anastacio.
Mabilis na naisugod sa pagamutan ang mga biktima pero dahil sa tindi ng pinsalang sinapit ni Macusi ay hindi na ito umabot pa ng buhay sa ospital.