Babae dedo, rider sugatan sa ‘hit and run’

MANILA, Philippines — Patay ang isang babaeng backrider habang sugatan ang driver ng si­na­sakyang motorsiklo matapos silang mabangga ng isang humahagibis na behikulo saka tinak­bu­han sa kahabaan ng Maharlika Highway sa Candelaria, Quezon nitong Sabado ng mada­ling araw.

Sa inisyal na ulat ng Quezon Police, idineklarang dead-on-arrival sa pagamutan ang nasabing babae na hindi pa na­tukoy ang pagkaka­kilanlan.

Patuloy namang nilala­patan ng lunas sa pa­ga­mutan si Margeon Maghirang, driver ng mo­torsiklo na nagtamo ng mga sugat sa katawan bunga ng insidente.

Sinabi ng pulisya na alas-2:30 ng madaling araw nang mangyari ang insidente sa bahagi ng Maharlika Highway sa ba­yan ng Candelaria. Ka­salukuyang binabagtas ni Maghirang ang nasabing highway at angkas ang naturang ba­baeng backrider nang ma­bangga sila ng isang behikulo na mabilis na tumakas sa lugar.

Agad na isinugod sa pagamutan ang mga biktima pero nabigo nang maisalba pa ang buhay ng nasabing babae.

Ang driver ng motorsiklo ay natukoy ang pagkakakilanlan sa pa­ma­magitan ng narekober na driver’s license nito.