SAN JOSE DEL MONTE CITY, Bulacan, Philippines — Arestado ng mga awtoridad ang 20- anyos na binata matapos umanong suntukin at gahasain ang 15-anyos na dalagita sa kanyang kuwarto sa Brgy. Muzon ng nasabing siyudad kahapon ng madaling araw.
Kinilala ni P/Col. Rommel Ochave, Bulacan Police director ang suspek na si Shane Guerero, tubong Caloocan City habang ang biktima ay itinago sa pangalang “Jenny”, Grade 8, tubong Pampanga, at kapwa residente ng Brgy. Muzon.
Sa report ng pulisya, dakong alas-2:00 ng madaling araw sa bahay ng biktima sa nasabing barangay.
Sa imbestigasyon, habang natutulog ang biktima ay may naramdaman itong lumalamas sa maseselang bahagi ng katawan niya.
Nagulantang siya nang makita ang pamangkin ng bayaw na nasa loob ng kuwarto niya.
Kinompronta niya ang suspek subalit walang kaabog-abog ay sinuntok at pinagbantaan siya na papatayin sakaling manlaban ito.
Dahil dito, nagpatuloy ang pang-aabuso ng suspek sa nanghihinang katawan ng takot na takot na dalagita.
Nang makatiyempo, sinabi niya ang nangyari sa kanyang kapatid na babae na agad nagsumbong sa barangay kaya nahuli ang suspek at isinuko sa pulisya.