2 lalaki sinalvage ng mga naka-kotse
SAN ANTONIO, Quezon, Philippines — Sinalvage sa pamamagitan ng pagbaril ang dalawang hindi nakikilalang lalaki ng isang grupo ng mga kalalakihan na lulan ng isang kotse kamakalawa ng gabi sa Barangay Pulo ng bayang ito.
Kapwa walang nakuhang ID o mapagkakakilanlan sa dalawa maliban sa ang unang biktima ay nakasuot ng puting t-shirt, asul na short, may taas na 5’6 hanggang 5’7, at tinatayang umeedad ng 45 hanggang 50. Nakasuot naman ng itim na t-shirt, dilaw na short, adidas na sapatos at tinatayang nasa 34-37 at may taas na 5’4-5’6 ang ikalawang biktima.
Sa inisyal na imbestigasyon, alas-7:30 ng gabi ay nakita ng mga residente ang pagdating ng isang Toyota Altis sa kanilang barangay at maya-maya ay nakarinig sila ng mga putok ng baril mula sa damuhan.
Nang umalis ang kotse na kinalululanan umano ng ilang hindi kilalang lalaki ay natagpuan ng mga residente ang dalawang duguang biktima na ang isa ay nakatali ang dalawang kamay sa pamamagitan ng panyo sa kanyang likuran.
Dead-on-arrival sa Liwag Medical Hospital ang dalawang biktima na kapwa may mga tama ng bala ng hindi pa batid na kalibre ng baril sa ulo at katawan.
Hinihinala ng mga operatiba ng Scene of the Crime Operatives (SOCO) na dinukot mula sa ibang lugar ang mga biktima at sa nabanggit lamang na barangay dinala upang likidahin para iligaw ang mga otoridad sa imbestigasyon.
- Latest
