MALOLOS CITY, Bulacan, Philippines — Bulagta sa magkakahiwalay na drug bust operation ang tatlong hininalang tulak ng ipinagbabawal na droga sa lalawigang ito kahapon ng madaling araw.
Kinilala ni P/Col. Lawrence Cajipe, Bulacan police director ang tatlong napatay na suspek sa mga alyas “Nato”, “JR” at “Jhay-ar”.
Si alyas Nato ay napatay sa Brgy. Tibagan, Bustos, Bulacan dakong ala-1:00 ng madaling araw matapos na makipagbarilan sa mga otoridad sa isinagawang buy-bust operation sa nasabing barangay. Nabawi sa lugar ang 21 plastic sachet ng shabu, buy-bust money at baril ng suspek.
Si alias JR ay napatay naman sa Brgy. Duhat, Bocaue matapos manlaban nang matunugan nito na police asset ang ka-transaksyon sa bentahan ng droga dakong ala-1:30 ng madaling araw. Narekober dito ang isang cal .38 revolver, anim na plastic sachet ng shabu at buy-bust money.
Sa Barangay Sto. Cristo, Pulilan, napatay rin si alias Jhay-ar nang manlaban ito sa mga otoridad drug bust dakong alas-3:40 ng madaling araw. Nabawi dito ang 29 plastic sachet ng shabu, isang cal .22 revolver at buy-bust money.