Ambulansya sinalpok ng 10-wheeler: 4 patay

TAGKAWAYAN, Quezon , Philippines — Apat katao ang kumpirmadong patay habang tatlo ang malubhang nasugatan na pawang mga sakay ng Manila bound na ambulansya makaraang­ banggain ng kasalubong na 10-wheeler truck sa kahabaan ng Quirino Highway sa Barangay San Vicente ng bayang ito, kaha­pon ng umaga.

Sa ulat ni P/Major­ Mar­celito Platino, chief of police dito, kinilala ang mga nasawi na sina Melchor Escandor, 45, may asawa, driver ng ambulansya na na­karehistro sa Albay pro­­­vincial government; Jo­celyn Es­padero; Silvestre Camposanto at 12-anyos na batang si Aljon Gime; pa­wang­ mga taga-Gubat­, Sor­so­gon. Ang isa ay dead-on-the-spot ha­bang­ ang dri­ver­ at dala­­­wang nabang­git ay dead-on-arrival sa ospital­.

Ginagamot naman sa Maria Eleazar District Hospital ang iba pang mga sakay ng ambulansya na sina Lanie Escandor, 43; Rose Ann Espineda, 30 at isang 8-anyos na kapatid ni Aljon.

Batay sa imbesti­gas­yon, alas-9:30 ng umaga habang tinata­hak ng ambulansyang­ mina­ma­neho ni Escandor ang highway upang dal­hin sa Maynila ang isa sa mga biktima na pasyente nang kainin ang kanilang linya at banggain ng humahagibis na kasalubong na 10-wheeler Isuzu Giga truck na minamaneho ni Gerardo Bandales.

Dahil sa lakas ng pagkakabangga, nayupi­ ang unahang bahagi ng ambulansya na naging sanhi upang magtamo ng grabeng pinsala sa ulo at katawan ang mga nasawi. Nahagip­ din ng trak ang naka­paradang van na mi­namaneho ni Domingo Tayoto na mapalad na hindi nasaktan.

Nasa kustodya na ng Tagkawayan Police ang driver ng trak na na­haharap sa patung-patong na kaso.