SANTIAGO CITY, Isabela, Philippines — Isang pekeng dentista ang dinakip ng mga ahente ng National Bureau of Investigation (NBI) sa bayan ng Delfin Albano ng lalawigang ito kahapon ng umaga.
Nakilala ang suspek na si Jerry Bumanglag, 56, residente ng Barangay San Roque sa nasabing bayan.
Ayon sa ulat ni NBI Provincial Director Timoteo Rejano, ang nadakip na suspek ay isang pekeng doktor na nagpapanggap na isang dentista sa loob ng mahigit 20 taon. Hindi umano mapagkakamalan na peke ang nasabing dentista dahil sa kumpleto ang mga kasangkapan at sertipikasyon sa loob ng kanyang klinika.
Gayunman, isang residente ang nagbigay ng impormasyon sa NBI matapos mamaga ang ngipin ng isang pasyente na sumailalim sa pagsusuri ng suspek.
Beneripika rin ng NBI sa pamunuan ng Philippine Dental Association-Isabela Chapter ang suspek kung may lisensya bilang doktor pero nakumpirmang nagpapanggap lang .
Nahaharap ngayon sa kasong paglabag sa RA 9484 o Philippine Dental Act of 2007 ang suspek na nasa kustodya ngayon ng NBI.