2 motor vs trak: 2 utas

NORTH COTABATO  , Philippines  — Maagang sinalubong ni Kamatayan ang dalawa katao makaraang masangkot sa karambola ang isang truck at dalawang motorsiklo sa aksidenteng naganap sa National Highway na sakop ng Brgy. Calandagan, Tacurong City, Sultan Kudarat. Kinilala ang isa sa nasawi na si Benito Gragasin, nasa hustong gulang habang inaalam pa rin ang pagkakakilanlan ng isa pa. Ayon sa ulat, naganap ang karambola dakong alas-9:00 ng gabi nitong Sabado kung saan inararo ng malaking truck ang dalawang motorsiklo na nagresulta sa pagkakasugat ng mga drayber at sakay nito.

Ayon sa rescue team na rumesponde sa aksidente, dalawang biktima ang agad dinala sa pagamutan dahil sa mga malubhang sugat na kanilang natamo na pinaniniwalaang mga sakay ng 2 motorsiklo at isa sa mga nakilala ay si Benito Gragasin ng Lambayong Sultan Kudarat kung saan nitong hapon ng Linggo lamang ay kumpirmadong pumanaw na. Samantala patuloy ang imbestigasyon sa naturang insidente.