Misis na kapitana, 1 pa sugatan
MANILA, Philippines — Dead-on-the-spot ang isang barangay kagawad habang sugatan pa ang dalawa kabilang ang misis nitong kapitana ng barangay matapos silang paulanan ng bala ng hindi pa nakilalang riding-in-tandem sa naganap na ambush sa Brgy. Monggoc, Pidigan, Abra kamakalawa ng hapon.
Ito’y ilang linggo bago ang itinakdang Barangay at SK elections sa Mayo 14 ng taong ito.
Nalagutan noon din ng hininga sanhi ng mga tinamong tama ng punglo sa iba’t-ibang bahagi ng katawan ang barangay kagawad na si Victor dela Cruz Pisco, habang isinugod naman sa pagamutan ang sugatang misis ng biktima na kinilalang si Brgy. Chairwoman Elida Sales Pisco at kapatid nitong si Myrna Pisco Vasquez; pawang residente ng Brgy. Immuli, Pidigan, Abra.
Sa ulat ng Cordillera Police, dakong alas-5:30 ng hapon sa nasabing lugar, kasalukuyang lulan ang mga biktima ng kulay asul na Elf truck na bumabagtas sa Pidigan-Pilar provincial road patungong Brgy. Immuli ng nasabing bayan nang mangyari ang pananambang.
Sa pahayag ng mga testigo bigla na lamang sumulpot sa lugar ang armadong riding-in-tandem na agad na pinagbabaril ang mga biktima at mabilis na nagsitakas patungo sa direksyon ng Brgy. San Isidro at Villaviciosa ng bayang ito.
Narekober naman sa pinangyarihan ng krimen ang mga basyo ng bala ng cal. 45 pistol.
Pinaniniwalaan namang may kinalaman sa pulitika ang motibo ng krimen habang patuloy ang masusing imbestigasyon sa kaso.