Misis inutas sa saksak; mister nag-suicide
Aileen at Ariel
LEGAZPI CITY, Albay , Philippines — Napatay ang 39-anyos na misis matapos itong saksakin ng kanyang mister na nagsaksak din sa sarili sa kanilang bahay sa Barangay Vinisitahan, bayan ng Donsol, Sorsogon noong Sabado ng umaga.
Tinangka pang isugod sa Donsol District Hospital subalit idineklarang patay ang misis na si Aileen Alim habang namatay din matapos magsaksak sa sarili ang asawang si Ariel Alim, 39, kapwa nakatira sa nasabing barangay.
Sa police report na nakarating sa Camp Simeon Ola, dakong alas-5 ng umaga, sa hindi mabatid na dahilan ay bigla na lamang pinagsasaksak ni Ariel ang kanyang misis na natutulog sa kanilang kuwarto.
Gayunman, matapos na tarakan ang asawa, nagsaksak din sa sarili si Ariel na agad na namatay.
Sa pahayag ng mga kaanak, pinaniniwalaang naboryong si Ariel na dati na umanong nakararanas ng sakit sa pag-iisip sa loob ng tatlong taon.
Narekober ng mga pulis sa loob ng silid ng mag-asawa ang 32 pulgadang patalim na ginamit sa pananaksak.
- Latest
