Totoy inutas, isinako ng adik

LEGAZPI CITY, Albay , Philippines – Natagpuang patay ang 9-anyos na totoy na nagtramo ng 41 saksak sa katawan matapos itong abandonahin sa bakanteng lote sa Doña Maria Subd. sa Barangay Tagas sa bayan ng Daraga, Albay kamakalawa ng hapon. Kinilala ni P/Chief Insp Arthur Gomez  ang biktima na si Ruel Bangga ng Purok 2 sa Barangay Kilicao. Base sa police report na nakarating sa Camp Simeon Ola, dakong alas-5:40 ng hapon ay inireklamo ng ilang residente ang mabahong amoy mula sa nasabing lugar. Nang usisain ng mga pulis na rumesponde ay bumungad sa kanila ang sako ng semento na naglalaman ng bangkay ng biktima na naagnas na. Ayon sa nanay ng biktima na si Margarita, nagpaalam ang kanyang anak para manood ng basketball pero hindi na ito nakauwi noong Biyernes (Abril 28). May teorya ang pulisya na napagtripang patayin ng adik ang bikitma.