TUGUEGARAO CITY, Cagayan, Philippines - Natapos din ang ilang araw na paghahanap ng mga kaanak ng isang 80-anyos na lolong nawawala noong nakaraang linggo nang kusang lumutang at napadpad ang naaagnas niyang bangkay sa pampang ng ilog sa Brgy. Bayo, Iguig, Cagayan kamakalawa. ?Ayon kay Sr. Insp. Avelino Canceran, hepe ng PNP Iguig, kinilala ang bangkay ni Paulino Cabrera, ng anak na si Cesar Cabrera sa morge ng Funeraria Ortiz sa lungsod na ito. Nabatid na nagpapaligo ng alagang kalabaw ang lolo nang siya’y tangayin ng malakas na alon dulot ng masamang panahon na iniwan ng bagyong Gener. Samantala sa Bolinao, Pangasinan, nalunod ang 18-anyos na si Carl Robin Mejia nang lumusong sa malalim na bahagi ng tubig sa Tara falls sa Brgy. Liwa-Liwa.Ayon kay Chief Insp. Joseph Mark Sibayan, hepe ng Bolinao Police, nagawa pang sagipin ng mga sumaklolo ang biktima subalit idineklarang patay sa Sampaloc Bolinao Community Hospital.