Lineman kisay sa kuryente

MANILA, Philippines – Kamatayan ang sinapit ng isang technician ng Quirino Electric Cooperative matapos itong makur­yente habang inaayos ang supply ng kuryente noong Sabado ng gabi sa Barangay Sta. Maria, bayan ng Maddela sa Quirino.

Nahulog mula sa poste ng kuryente ang biktimang si Lineman Evert Lloyd Agpawa bandang alas-10: 20 ng gabi.

Ayon kay P/Chief Insp. Avelino Cuntapay, Quirino PNP spokesperson, walang safety gear si Agpawa nang umakyat ng electric post para ayusin ang nawasak na kable ng kuryente na lumikha ng brownout sa nasabing barangay.

Nabatid na katatapos lamang na ayusin ng biktima ang kable nang aksidente itong mapahawak sa talop na linya ng kuryente.

Naisugod pa sa Diduyon District Hospital sa bayan ng Maddela subalit idineklarang patay ang biktima.