MANILA, Philippines - Nagwakas na ang misteryo sa pagkawala noong isang taon ng isang mag-asawa nang matagpuang pawang mga kalansay na at nakabaon sa isang hukay sa Brgy. Salaban, Amadeo, Cavite nitong Huwebes ng hapon.
Kinilala ang mga biktima na sina Eleuterio Bayot at misis na si Maria Victoria, pawang residente ng Brgy. Dagatan, Amadeo, Cavite.
Sa ulat ng Police Regional Office (PRO)IV A, dakong alas-4:30 ng hapon nang matagpuan at mahukay ang kalansay at bungo ng mag-asawa sa taniman ng pinya sa nasabing lugar.
Napaulat na nawawala ang mag-asawa noon pang Setyembre 1, 2015 na matagal na ring pinaghahanap ng kanilang mga mahal sa buhay at mga kaibigan.
Nagresponde ang Scene of the Crime Operatives (SOCO) sa pamumuno ni Sr. Inspector Amer Magsumbol at narekober sa lugar ang 16 piraso ng magkakahiwalay na kalansay at bungo ng mga biktima, gula-gulanit na pantalon at isang rosary na naka-disenyo na singsing.