Magtiyahin patay sa sunog

MANILA, Philippines - Patay ang magtiyahin habang tatlo naman ang nasu­gatan matapos masunog ang apat na bahay sa Barangay 9, Victorias City, Negros Occidental kahapon ng madaling araw. Kinilala ang magtiyahin na sina Lalaine Francisco, 42; at John Lloyd Francisco, 12, residente sa nasabing barangay. Isinugod naman sa pagamutan ang mag-iinang sugatan na sina Rowena Francisco, mga anak na sina Agnel, John Michacel at isang tinukoy lamang sa palayaw na si Jan-jan. Sa ulat ni Fire Officer 1 Stephen Pedragas ng Victorias City Fire Marshal, nag-overheat na battery sa universal charger na naiwang nakasaksak ang pinagmulan ng apoy na tumupok sa bahay ng mga biktima. Naapula naman ang sunog bandang  alas-3:30 ng madaling araw habang patuloy naman ang imbestigasyon.