TUGUEGARAO CITY, Philippines – Isang 83-anyos na lolong taga-Ilocos Norte na halos dalawang dekada nang tinutugis ng batas sa kasong panggagahasa ang nasukol ng pulisya sa pinagtataguang lungga sa Barangay Poblacion, Diadi, Nueva Vizcaya kamakalawa. Kinilala ni Chief Insp. Jonathan Papay, tagapagsalita ng Ilocos Norte Police ang suspek na si Gavino Nacino na may patong na pabuyang P90,000 sa kanyang ulo ng DILG at tubong Brgy. Abaca, Bangui, Ilocos Norte. Ayon kay Papay, noong Mayo 1994 pa ipinalabas ni Bangui RTC Judge Rodolfo Manzano ang warrant of arrest nang walang piyansa kay Nacino para sa kasong two counts of rape na isinampa ng isang dalagita noong 60 anyos na ito. Si Gavino ay number 2 top most wanted sa batas sa kanyang teritoryo sa Ilocos Norte dagdag ni Papay.