BULACAN, Philippines – Pinabulagta ang magkapitbahay na lalaki matapos na pagbabarilin ng tatlong hindi kilalang lalaki sa harapan ng kanilang bahay sa Brgy. Gumaok Central, San Jose Del Monte City, Bulacan kamakalawa ng gabi. Kinilala ang mga biktima na sina David Pombo, 48, traysikel drayber at Salvador Uson Jr., 40, kapwa nakatira sa nasabing barangay. Tinutugis na ng pulisya ang mga suspek na tumakas patungong Quirino Highway sa Brgy. Tungkong Mangga lulan ng traysikel. Base sa ulat ni PO1 Ritchie Militante, nag-uusap ang mga biktima kasama ang isa pang kapitbahay na si Jefferson Manuel sa harap ng kanilang bahay nang biglang dumating ang traysikel ng mga suspek saka isinagawa ang pamamaril. Hindi naman sinaktan si Manuel na nabigla sa nasaksihang pamamaril kung saan narekober sa crime scene ang anim na basyo ng cal. 45 psitol.