QUEZON, Philippines – Hindi na umabot ng buhay sa ospital ang 49-anyos na driver matapos itong pagbabarilin ng kapitbahay na negosyante dahil lamang sa simpleng away-trapiko sa Barangay 10 sa bayan ng Catanauan, Quezon, kamakalawa ng gabi. Dalawang tama ng bala ng cal.9mm pistol ang tumapos sa buhay ng biyudong si Eduardo Ricafrente habang naaresto naman ang suspek na si Fidel de Villa, 64. Ayon sa pulisya, dakong alas-8:40 ng gabi habang naglalakad ang suspek sa eskinita nang masagi ito ng bahagya ng minamaneho ng biktima. Gayon pa man, sumiklab ang mainitang pagtatalo hanggang sa umuwi ang suspek at pagbalik ay pinagbabaril ang biktima. Nahaharap sa kasong homicide ang suspek na nakapiit ngayon sa municipal jail.