MANILA, Philippines – Kalaboso ang 26-anyos na pasaway na Kano matapos itong masangkot sa pambu-bully, pambabastos at tangkang panununtok sa bagitong pulis na sumita sa kanya habang nagmamaneho ng motorsiklo sa bayan ng Buhi, Camarines Sur kamakalawa ng hapon.
Sa ulat na isinumite sa Camp Crame, kinilala ang suspek na si Kenneth Scheneider, pansamantalang naninirahan sa Barangay San Jose Baybayon.
Naganap ang insidente habang abala ang mga operatiba sa pagpapatupad ng Oplan Sita sa Barangay San Pedro.
Nabatid na sinita ni PO1 Junar Nachor ang suspek at ka-live-in na si Gessele Asetre dahil sa pagmamaneho ng walang helmet.
Agad na inisyuhan ni PO1 Nachor ng citation ticket ang magka-live-in subalit binully ito ng Kano, pinunit ang citation ticket at itinapon kung saan tinangka pa nitong sapakin ang pulis.
Napigilan naman ang suspek ng ka-live-in na Pinay kung saan agad namang isinailalim ng pulisya sa kustodya ang nasabing dayuhan na ngayon ay nahaharap sa kasong direct assault upon an agent in authority.