BULACAN, Philippines – Tinatayang aabot sa P.2 mlyong halaga ng alahas ang nalimas makaraang pasukin ng limang armadong kalalakihan ang isang jewelry shop sa Brgy. Malhacan, Meycauayan City, Bulacan kahapon ng umaga. Naganap ang nakawan dakong alas-10:30 ng umaga makaraang magpanggap na mga customer ang limang kawatan sa P. Zuñiga Jewelry Shop. Sugatan ang security guard na si Melchor Cu matapos paluin sa ulo ng baril ng isa sa limang holdaper. Binasak ng mga kawatan ang salamin ng display rack saka tinangay ang mga alahas at ang cal. 38 revolver ng sekyu saka tumakas lulan ng tatlong motorsiklo. Sa follow-up operation nina P/Senior Insp. June Tabigo-on at P/Chief Insp. Leopoldo Estorque, narekober ang isa sa tatlong motorsiklo (OO-2316) sa Brgy. Baesa, Quezon City. Kasalukuyang sinusuri ng pulisya ang footage ng CCTV camera sa nasabing jewelry shop para makilala ang mga suspek.