CAVITE, Philippines – Rehas na bakal ang binagsakan ng tatlong Nigerian sa inilatag na buy-bust operation sa magkakahiwalay na lugar sa Dasmariñas City, Cavite, kamakalawa ng gabi. Pormal na kinasuhan ang mga suspek na sina Okoye Thidera, 32, ng Block 15 Lot 9 sa Brgy. Fatima 1, Dasmariñas City, Cavite; Paschal Ezeanaka, 26, estudyante ng Philippine Christian University, ng Block 12 Lot 76, Malinta, Regency Town Homes, Barangay Sampaloc II, Dasmariñas City; at si Jonathan Businge, 36, ng #560 R Palma, Barangay San Antonio, Cavite City, Cavite. Ayon kay PO3 Daisy Diones, si Okoye ay nakumpiskahan ng 300 gramo ng shabu sa isinagawang buy-bust operation sa Barangay Burol. Samantala, sina Ezeanaka at Businge ay nakumpiskahan naman ng 200 gramo ng shabu sa bisinidad ng Brgy. Sampaloc 1. Kumpiskado rin ang Toyota Camry na may plate number XNH 837 na pag-aari ng isa sa mga suspek.