BULACAN, Philippines – Kalaboso ang binagsakan ng magkapatid na miyembro ng Akyat-Bahay Gang matapos na maaresto ng mga operatiba ng pulisya dahil sa pangungulimbat ng mga ari-arian, at pera sa isang tindahan sa Barangay Caysio, bayan ng Sta. Maria, Bulacan kahapon ng umaga. Pormal na kinasuhan ang kambal na suspek na sina Alfred Alliño at Wilfred Alliño, mga nakatira sa Saint Mary’s Subdivision sa Northville 5A sa nabanggit na barangay. Sa ulat na nakarating kay P/Supt. Rodolfo Hernandez, lumilitaw na nilimas ng mga suspek ang mga ari-arian mula sa bahay ni Joemar Dogillo. Gayon pa man, mabilis na humingi ng tulong sa mga barangay tanod si Dogillo kaya naaresto ang mag-utol. Nasamsam sa mga suspek ang isang bull cap na puno ng mga barya, at dalawang celpone habang dumagsa naman sa himpilan ng pulisya ang iba pang biktima ng mag-utol.