Babaeng suspek sa kidnapping noong 2011 tiklo sa Agusan

MANILA, Philippines – Arestado ang isang babaeng itinuturong nasa likod ng pagdukot sa isang Australian national noong 2011 matapos makorner sa isang raid sa Trento, Agusan del Sur.

Nasakote ang suspek na si Edeliza Ulep na may alyas Gina Perez sa Purok 7, Villa Street sa bayan ng Trento bandang 12:45 ng tanghali nitong kamakalawa.

Dinakip si Ulep sa bisa ng arrest warrant para sa kasong kidnapping with ransom matapos dukutin si Richard Warren Rodwell noong Disyembre 2011.

Puwersahang isinama ng kidnap for ransom syndicate si Rodwell mula sa kaniyang bahay sa Ipil, Zamboanga Sibugay.

Pinakawalan ang biktima makalipas ang 472 araw matapos magbayad ng hindi matukoy na halaga ng ransom.

Ayon sa mga awtoridad si Ulep ang tumanggap ng ransom.

Kasalukuyang nasa kustodiya ng Zamboanga Sibugay Provincial Police ang suspek.