MANILA, Philippines - Bagsak-kalaboso ang adik na mister at kerida nito matapos ipakulong ng pinagtaksilang misis sa ginanap na raid sa hotel na inookupa ng magkalaguyo sa Barangay San Antonio Poblacion, bayan ng Nabua, Camarines Sur kamakalawa.
Sa ulat ni P/Supt. Primo Golingay na isinumite sa Camp Crame, naaktuhang magkaulayaw sa Macagang Hotel and Resort ang magkalaguyong sina Pedro Tarrosa, 40; at Marieta Falcon-Coronado, 46.
Kapwa inaresto ang magkalaguyo matapos namang humingi ng tulong sa pulisya ang misis ni Tarrosa na si Nelrose Tarrosa kaugnay sa nadiskubre nitong pangangalunya ng kaniyang mister.
Bandang alas-9 ng umaga nang lusubin ng mga operatiba ng pulisya ang Room 102 ng nasabing hotel kasama ang misis ng biktima upang hulihin sa akto ang magkalaguyo.
Hindi na nakapalag ang magkalaguyo matapos maaktuhang magkasiping sa kama ng hotel room.
Nasamsam sa mister ang isang plastic sachet ng shabu at mga drug paraphernalia. Joy Cantos