BULACAN, Philippines – Napaslang ang 47-anyos na obrero habang sugatan naman ang kasama nitong babae matapos na pagbabarilin ng tatlong kalalakihan bahagi ng Barangay Calvario, Meycauayan City, Bulacan kamakalawa ng hapon. Labing-isang bala ng cal. 45 pistol ang tumapos sa buhay ni Reynaldo Mendoza habang naisugod naman sa ospital ang sugatang babae na itinago lamang sa pangalang Jamaica na kapwa nakatira sa Barangay Bayugo. Tinutugis na ng mga operatiba ng pulisya ang mga suspek na sina Salemar Salo, 30; Maichael Sarif, at si Saidamin Lamondot, mga nakatira sa Northville 3, Barangay Bayugo. Ayon kay SPO1 Willie Tadeo, magkasamang naglalakad ang dalawa nang lapitan at pagbabarilin ng mga suspek pagsapit sa bisinidad ng F. Dazo Street sa nasabing barangay. Sinisilip ng pulisya ang anggulong may kinalaman sa onsehan sa shabu ang motibo sa krimen.