MANILA, Philippines - Masaklap ang sinapit ng isang 28 anyos na dalagang may diperensya sa pag-iisip na matapos gawing parausan, mabuntis ay pinaslang pa sa saksak sa huling pagkakataong halayin ito ng sariling tiyuhin kamakalawa ng gabi sa isang liblib na lugar sa Sta Fe, Leyte.
Sa ulat ng Leyte Provincial Police Office, kinilala ang nasawing biktima na si Annalyn Tercenio, residente ng Brgy. Gapas, Sta Fe ng lalawigang ito. Ang krimen ay naganap dakong alas-6 ng gabi nitong Huwebes sa lugar.
Ang biktima na natuklasang buntis na tinatayang nasa 4-5 buwan ang sanggol sa sinapupunan ay dead-on-the-spot sa tinamong malalalim na saksak sa iba’t-ibang bahagi ng kaniyang katawan.
Sa imbestigasyon ni SPO3 Cyril Tiu, may hawak ng kaso, natukoy naman ang suspek na tumakas matapos ang malagim na krimen na si Pablo Agotic alyas Boboy na tinutugis na ng pulisya.
Ayon kay Tiu, napag-alaman na matagal ng hinahalay ng suspek ang dalaga hanggang sa mabuntis ito.
Napilitan naman ang biktima na ipagtapat sa kaniyang tiyahin ang kawalanghiyaan ng suspek pero nagdadalawang isip pa itong gumawa ng aksyon.
Samantalang ng malaman naman ng suspek na nagsumbong na ang biktima ay sinamantala nito na nag-iisa ito kung saan ay puwersahang itong pinasok sa silid, ginahasa at saka brutal na pinaslang.