BATANGAS, Philippines – Dalawa-katao ang namatay habang 44 naman ang sugatan sa naganap na banggaan ng pampasaherong bus at 10-wheeler truck sa kahabaan ng Southern Tagalog Arterial Road (STAR) sa Lipa City, Batangas noong Huwebes ng gabi.
Kinilala ang namatay na konduktor ng bus na si Arnel Diaz, at ang 18-anyos na pasahero na si Jade Anthony Dimalibot.
Ayon kay P/Supt. Jacinto Malinao, hepe ng Lipa City PNP, bandang alas-11 ng gabi nang makaidlip umano ang driver ng Dimple Star Bus (TYS-454) na si Lorenzo Caringal Jr. kaya bumangga sa sinusundan nitong trailer trak (RMB-486) na minamaneho naman ni Rodel Gono pagsapit sa KM-76 ng Barangay Pusil sa nasabing lungsod.
Namatay habang isinusugod sa Mary Mediatrix Medical Center sina Diaz at Dimalibot, base sa pagsusuri nina Dr. Arturo Marquino at Dr. Pantaleon Huzon.
Samantala, 44- pasehero ang nasa kritikal na kondisyon na naisugod sa nasabing ospital. Nahaharap naman sa mga kasong kriminal ang driver ng bus na si Caringal kung saan nakakulong ngayon sa himpilan ng pulisya sa Lipa City.