MANILA, Philippines – Brutal na kamatayan ang sinapit ng 17-anyos na kolehiyala habang dalawa naman ang malubhang nasugatan makaraang pasukin ang kanilang bahay saka pagsasaksakin ng hindi kilalang lalaki na sinasabing lulong sa bawal na droga noong Lunes sa Lipa City, Batangas.
Naisugod pa sa Lipa Medix Medical Center subalit idineklarang patay si Geraldine Enriquez, 1st year sa kursong Bachelor of Science in Business Administration (BSBA) sa Kolehiyo ng Lungsod ng Lipa.
Patuloy namang nakikipagbuno kay kamatayan ang dalawa pang estudyante na sina Liezel Hernandez, 16; at Ericka Mae Aala, 17, mga nangungupahan sa Villa de Lipa II sa Barangay Sabang sa nasabing lungsod.
Pinaghahanap na ng pulisya ang suspek na may katamtaman ang pangangatawan, nakasuot ng itim na T-shirt at 5’8 ang taas.
Base sa police report na isinumite sa Camp Crame, pasado alauna ng madaling araw nang pasukin ng adik ang mga biktimang mahimbing na natutulog sa kanilang inuupahang bahay sa Phase 2, Block 8, Lot 2 sa nabanggit nan lugar.
Magkakasunod na pinagsasaksak ang mga estudyanteng tulog kung saan nagawa namang makatakbo ang isa sa mga ito kahit sugatan at humingi ng saklolo sa mga kapitbahay.
Naalerto naman ang suspek kaya mabilis na tumakas sa hindi nabatid na direksyon.