MANILA, Philippines – Nasa kritikal na kalagayan ang anim na buwang buntis na misis makaraang pagsasaksakin ng seloso nitong ka-live-in sa kanilang bahay sa Barangay Sinaloc, El Salvador City sa Misamis Oriental kamakalawa ng gabi. Walong saksak gamit ang matalim na gunting ang tumama sa katawan ng biktimang si Jonalyn Mantos na kasalukuyang nakikipaglaban kay kamatayan. Sa inisyal na imbestigasyon ng pulisya, nasa impluwensya ng alak ang suspek na kinilala sa alyas Bong na nasakote sa follow-up operations ng pulisya. Sa ulat ni P/Inspector Michael Lacasan, deputy chief of police ng El Salvador City, ang biktima ay nagtamo ng mga tama ng saksak sa likurang bahagi ng katawan, mata at iba pa. Nabatid na nagkaroon ng mainitang pagtatalo ang magka-live-in dahil sa matinding selos.