QUEZON, Philippines - Binaril at napatay ang isang tindero ng gulay ng kanyang kapitbahay na sikyu dahil sa hinalang ang biktima ay kalaguyo ng misis ng suspek sa Barangay Concepcion 1, sa bayan ng Sariaya, Quezon kamakalawa ng umaga.
Napuruhan sa likurang bahagi ng ulo ang biktimang si Rolando Mirambel, 32, habang pinaghahanap naman ng pulisya ang suspek na si Morfeo “Pio” Escopio, kawani ng D’Jaguar Security Agency.
Sa imbestigasyon ng pulisya, lumilitaw na kinompronta ng suspek ang biktimang nakatayo sa harapan ng kanyang bahay kaugnay sa kumakalat na tsismis na kalaguyo nito ang kanyang misis.
Mariin naman itinanggi ng biktima ang akusasyon subalit hindi pinaniwalaan ng suspek at tuluyang pinagbabaril.
Kahit duguan na ang biktima ay nakatakbo pa ito palayo subalit pinutukan pa uli ng suspek sa likurang bahagi ng ulo kaya sumubsob at namatay sa damuhan.
Bukod sa kasong murder na kinakaharap ng suspek ay nahaharap din ito sa asuntong pagnanakaw ng baril ng kanyang kumpanyang pinaglilingkuran dahil hindi nito ibinigay ang baril sa kanyang bisor.