LEGAZPI CITY, Albay, Philippines – Nasa kritikal na kondisyon ngayon sa pagamutan ang isang misis at 26-anyos na binata, na umano’y kalaguyo nito matapos na pagtatagain ng mister ng ginang nang maabutang magkasiping sa loob ng bahay ng lover ng asawa sa Brgy. Sampaloc, Sorsogon City kahapon ng madaling-araw.
Kinilala ang mga biktima na sina Melinda Janer, 39, at umano’y lover nito na si Renante Malazarte; kapwa residente sa lugar.
Pinaghahanap naman ang suspek na si Felixberto Janer Jr., 44-anyos, asawa ni Melinda na mabilis na tumakas.
Sa ulat ng pulisya, dakong ala-1:30 ng madaling-araw nang sugurin ng nasabing mister ang tinutuluyan ng kalaguyo ng asawa nang may makapagsabi ritong nakita ang ginang sa loob ng bahay ng lover nito.
Nang maaktuhan ang dalawa ay pinagtataga ito ng suspek na bagaman nakasigaw pa ang ginang upang bigyang babala ang lover ay hinarang ito ng kasamahan ng kanyang mister na nagsilbing look-out sa insidente.
Nabatid na ang ginang ay may isang buwan nang hiwalay sa kanyang mister matapos itong sumama sa kanyang lover. Iniimbestigahan pa ang kaso.