Lolang ‘mangkukulam,’ dinedo

TUGUEGARAO CITY, Cagayan, Philippines - -  Napatay ang 61-anyos na lola na inakusahang mangkukulam matapos itong ratratin  ng kanyang kapitbahay na mister  sa Barangay Tangaoan, bayan ng Piddig, Ilocos Norte kamakalawa. Sa police report na nakarating kay P/Senior Insp. Don Acacio, armado ng baril na sinugod ng suspek na si Jorge Jose ang bahay ng biktimang si Lydia Valentin dahil sa pag-aakalang mangkukulam. Kaagad namang pumasok at nagsara ng pintuan ng kanyang bahay ang biktima pero pinagbabaril ng suspek ang pintuan kung saan ay tumagos ang mga bala at napuruhan ang matanda ng dalawang tama ng bala sa katawan. Nabatid na nagkasakit ang misis ng suspek kung saan inakalang kinulam ng biktima habang pinaghahanap naman ng pulisya ang tumakas na suspek.