MANILA, Philippines - Umaabot sa 12-katao ang nasagip habang siyam naman ang nawawala makaraang magbanggaan ang dalawang barko sa pagitan ng karagatan ng bayan ng Ternate at Caballo Island sa Cavite City, Cavite kamakalawa ng gabi.
Sa inisyal na ulat na ipinarating sa Camp Crame, sinabi ni PO3 Judito BaÂligod ng Ternate PNP, dakong alas-11 ng gabi nang magsalpukan ng dalawang barko.
Ayon kay Baligod, ang mga nagbanggaan ay kinabibilangan ng isang shipping vessel na Dan Israel na pag-aari ni Danny Ang ng Malabon City at isang hindi pa mabatid na uri ng sasakyang pandagat.
Nang matanggap ang impormasyon ay agad namang nagsagawa ng search and rescue operations ang mga tauhan ng PNP Maritime at Philippine Coast Guard.
Gayon pa man, 12 tripulante ang nasagip na kasalukuyang nasa Corregidor Island.
Hindi naman natukoy sa ulat ang pagkakakilanlan ng mga nasagip at nawawalang mga tripulante ng barko.
Samantala, patuloy naman ang search and rescue operations sa siyam pang nawawalang tripulante.