MANILA, Philippines - Brutal na napaslang ang 36-anyos na ama matapos itong pagsasaksakin ng kanyang nakaalitan sa harap mismo ng kanyang anak sa Barangay Marsolo sa bayan ng Naga, Zamboanga Sibugay kamakalawa ng tanghali. Kinilala ng pulisya ang biktima na si Malam Adlo na nagtamo ng malalim na saksak sa kaliwang dibdib. Nagimbal naman ang anak nitong si Lowie Adlo, 8, matapos na masaksihan ang pagpatay sa kaniyang ama. Ayon sa imbestigasyon, naglalakad pauwi ang mag-ama nang makasalubong ang nakaalitang kapitbahay pagsapit sa harapan ng bahay ni Sedra Bulawan. Agad na niyakap ng suspek ang biktima saka biglang inundayan ng saksak sa dibdib. Tugis naman ng pulisya ang suspek na mabilis na tumakas lulan ng motorsiklo.