Senate probe sa mga opisyal, empleyado ng gobyerno na gumagamit ng droga isinulong

MANILA, Philippines — Isinulong ni Sen. Ronald “Bato” Dela Rosa na paiimbestigahan ang mga halal na opisyal at empleyado ng gob­yerno na gumagamit ng ilegal na droga.

Sa Senate Resolution No. 1163 ni Dela Rosa, ipinunto nito na ayon sa batas, dapat isulong ng gobyerno ang maigting na kampanya laban sa drug trafficking at paggamit ng dangerous drugs.

Ipinaalala ni Dela Rosa na sa nakaraang State of the Nation Address ni Pangulong Ferdinand Marcos Jr., binanggit nito na ipagpapatuloy ng kanyang administrasyon ang “8 Es” na epektibong illegal drugs strategy.

Subalit sa kabila umano ng “bloodless war on dangerous drugs” ng Marcos admin, lumutang ang security breach sa Philippine Drug Enforcement Authority (PDEA).

May mga “high-profile individuals” na nabanggit sa nasabing PDEA leaks at confidential documents.

Mismong si Marcos anya ang nagsabi sa kanyang SONA na sa higit 6,000 naarestong high-value targets ng kanyang gobyerno, 440 ay mga empleyado ng gobyerno - 42 uniformed personnel at 77 elected officials.

“It is alarming that more than 7% of the total number of high-value targets is composed of government employees, thereby underscoring the need to ensure that government offices, occupied by those most expected to adhere to the law, are truly drug-free workplaces,” ani Dela Rosa.