PAF tuloy sa pagpapatrol vs ‘arrest order’ ng China sa West Philippine Sea

MANILA, Philippines — Tiniyak ng Philippine Air Force (PAF) na tuloy ang kanilang pagpapatrolya sa West Philipine Sea (WPS) sa kabila ng pagpapairal ng China ng ‘arrest policy’ laban sa sinumang dayuhan na papasok sa South China Sea.

Sa panayam ng Super Radyo DZBB kay PAF spokesperson Colonel Maria Consuelo Castillo, sinabi nito na walang makapipigil sa kanilang ginagawang monitoring dahil bahagi ito ng kanilang tungkuling at trabaho.

Aniya, babantayan nila ang territorial water ng Pilipinas at mga exclusive economic zone (EEZ).

“Patuloy lang talaga ang ating maritime patrol to ensure na namo-monitor natin lahat ng activities both in the air and on the sea, dito sa ating exclusive economic zone, pati na rin sa ating territorial waters,” ani Castillo.

Sabado nang simulang ipatupad ng China ang patakaran na aarestuhin at ikukulong ang mga “foreign trespassers” sa South China Sea sa loob ng 60 ng walang paglilitis.

Maging ang Philippine Coast  Guard (PCG) ay patuloy sa pagpapatrolya at hinihikayat ang mga mangingisda na ituloy lamang ang kanilang pangingisda sa lugar.

Dagdag pa ni Castillo, ang kanilang pagpapatrol ay para rin sa kampanya ng pamahalaan laban sa smuggling.

Sa katunayan, kailangan pa ng PAF ng karagdagang air assets para sa pagpapaigting ng kanilang monitoring sa WPS at sa ibang panig ng bansa.