Pinoy boxers sumuntok ng 5 medals sa Asian tourney

MANILA, Philippines — Sumuntok ang national boxing team ng limang medalya — isang pilak at apat na tanso — sa 2024 ASBC Asian Elite Men & Women Championships na ginanap sa Chiang Mai, Thailand.

Galing ang nag-iisang pilak na medalya kay Marvin Tabamo sa men’s 51kg division.

Nagkasya sa pilak si Tabamo matapos matalo sa finals kay Uzbekistan pug Asilbek Jalilov via unanimous decision.

Tatlong hurado ang nagbigay ng 30-27, habang dalawa naman ay may parehong 29-28 — lahat pabor sa Uzbek fighter.

Nakapasok si Tabamo sa finals nang ilampaso nito sa semis si Hsu Po Hau ng Chinese-Taipei via referee-stopped-contest.

Kabilang rin sa mga pi­nataob ni Tabamo sina Siiovush Mukhammadiiev ng Ukraine sa first round via unanimous decision at Wang Xiangkun ng China sa quarterfinals via split decision.

 Maliban sa pilak, nakahirit ang Pinoy boxers ng apat na tanso mula kina Jay Bryan Baricuatro (men’s 48kg), Mark Ashley Fajardo (men’s 63.5kg), Ian Clark Bautista (men’s 57kg) at Riza Pasuit (women’s 57kg).

Nagkasya sa tanso sina Baricuarto, Fajardo, Bautista at Pasuit matapos matalo sa kani-kanyang semis bouts.

Ang iba pang miyembro ng koponan ay sina Flint Jara, Mervin Alcober at Ofelia Magno na pare-parehong nakaabot sa quarterfinals.

Hindi lumahok sa naturang torneo sina Tokyo Olympics silver medalist Carlo Paalam at bronze medalist Eumir Felix Marcial, at si Tokyo Olympics silver medalist at Paris Olympics bronze winner Nesthy Petecio.

Kasama ng boxing team na ipinadala ng Association of Boxing Alliances in the Philippines (ABAP) sa Thailand si Olympic bronze medalist Roel Velasco.