Mapua Cardinals ipinagpag ang Knights
MANILA, Philippines — Pinabagsak ng Mapua University ang Letran College, 77-62, sa kanilang ‘Battle of Intramuros’ sa NCAA Season 100 men’s basketball tournament kahapon sa FilOil EcoOil Centre sa San Juan City.
Humakot si Chris Hubilla ng 18 points at 12 rebounds para itaas ang Cardinals sa 3-1 tampok ang three-game winning streak.
“Sumusunod lang ako sa sistema and nakapag-adjust na ako kasi pangatlong laro namin na sobrang gigil ko, parang excited ako,” ani Hubilla.
Bagsak ang Knights sa 2-2.
Kumawala ang Mapua sa second period, 34-20, patungo sa paghuhulog sa Letran sa 47-30 sa third quarter.
Lalo pang ibinaon ng Cardinals ang Knights sa 64-45 mula sa drive ni Hubilla sa huling 5:46 minuto ng final canto.
Samantala, tinakasan ng Lyceum of the Philippines University ang Arellano University sa overtime, 90-86.
Umiskor sina John Barba at McLaude Guadana ng pinagsamang 11 points sa extra period para itaas sa 2-2 ang baraha ng Pirates.
Bumulusok ang Chiefs sa 0-4.
Tumapos si Barba na may 25 points, habang humugot si Guadana ng anim sa kanyang 12 markers sa extension para sa Lyceum.
“Itong panalo na ito kailangan namin para umangat ulit,” wika ni Barba. “Ginagawa ko lang ang trabaho ko every game and ‘yun ang resulta, nakuha namin ang trabaho.”
Nag-ambag si Gyle Montano ng 16 points at may 11 at 10 markers sina Simon Penafiel at Renz Villegas, ayon sa pagkakasunod.
- Latest
