Guermali, Ubas nagtakbo ng gold
MANILA, Philippines — Inangkin nina Olympic hopefuls Yacine Guermali at Janry Ubas ang gintong medalya sa kanilang mga events sa pagsisimula ng ICTSI Philippine Athletics Championships kahapon sa PhilSports oval.
Nanguna si Guermali sa men’s 5,000 meters sa bilis na 14 minuto at 18.83 segundo kasunod sina national team mainstay Sonny Wagdos (14:54.95) at Noli Torre (15:05.00) para sa pilak at tanso, ayon sa pagkakasunod.
“Great moment for me,” sabi ng 24-anyos na Fil-Moroccan na national record-holder sa 1500m at 5000m events.
Lumundag naman si Ubas ng 7.83m para pagharian ang men’s long jump at talunin sina Kent Francis Jardin (7.39m) at Algin Gomez (7.20m).
Samantala, nanguna si national record holder Lauren Hoffman sa women’s 100m hurdles heat sa bilis na 13.61 segundo na malayo sa kanyang 13.41 segundo na itinala sa Duke Invitational kamakailan.
Talo naman si Phnom Penh Southeast Asian Games silver winner Gennah Malapit kay Elizabeth Sicat ng Adamson sa agawan sa ginto sa women’s Under-20 javelin throw sa inihagis nitong 33.5m.
- Latest
