MANILA, Philippines — Nakawala man sa kanila ang tsansa sa Game Two, tiniyak ng Squires na tuluyan na nilang makokopo ang ikalawang sunod na korona sa Game Three.
Pinatumba ng Letran ang University of Perpetual Help System DALTA, 93-76, sa ‘winner-take-all’ game para pagharian ang NCAA Season 99 juniors basketball tournament kahapon sa Filoil EcoOil Centre sa San Juan City.
Tinapos ng Squires sa 2-1 ang kanilang best-of-three championship series ng Junior Altas para sa ika-14 juniors crown sa harap ni Perpetual Altas legend Scottie Thompson ng Barangay Ginebra.
Humataw si Syrex Silorio ng 27 points, 6 assists at 5 rebounds para pamunuan ang Letran habang tumipa si Finals MVP Jonathan ‘Titing’ Manalili ng 19 points, 6 steals at 5 assists.
“It’s sweet to us kasi wala nag-e-expect na papasok kami sa Final Four, much more sa finals after we lost key players,” sabi ni Squires coach Allen Ricardo.
Nagdagdag si Daniel Padilla ng 17 points at humakot si 6-foot-5 George Diamante ng 9 points, 11 boards at 8 assists.
Kumamada sina MVP Amiel Acido, JD Pagulayan ay Icee Callangan ng tig-16 points para sa Junior Altas na No. 1 team sa elimination round.
Bumanat si Silorio ng 14 points sa first half para sa 49-38 halftime lead ng Letran patungo sa 86-70 pagbaon sa Perpetual sa huling 1:10 minuto ng fourth quarter.