MANILA, Philippines — Giniyahan ni Almond Vosotros ang TNT Triple Giga sa knockout quarterfinal round ng PBA 3x3 Season 3 First Conference Leg 3 matapos ang 3-0 record sa pool play kahapon sa Ayala Malls Manila Bay.
Umiskor si Vosotros ng siyam na puntos sa 21-18 pagtakas ng TNT sa Blackwater habang may 12 marker naman siya sa 21-15 pagdaig sa Cavitex sa Pool C.
Nagtala rin si Vosotros ng anim na marka para tulungan ang Triple Giga sa 21-16 paggiba sa Terrafirma Dyip papasok sa quarterfinals match nila ng Ginebra Gin Kings ngayon.
Itinagay ng Gin Kings, nagkampeon sa first at second leg, ang 1-1 baraha sa Pool A matapos ang 15-12 paggupo sa Purefoods TJ Titans kasunod ang 10-17 kabiguan sa Pioneer Elastoseal Katibays.
Nagposte naman ng magkatulad na 2-1 kartada ang Leg 2 runner-up Meralco at Leg 1 second placer San Miguel sa Pool B.
Wagi ang Bolts sa NorthPort Batang Pier, 19-9, at sa Beermen, 14-13, ngunit minalas sa Wilcon Depot, 13-15.