Pogoy out sa sixth window

MANILA, Philippines — Nabangasan na naman ang lineup ng Gilas Pilipinas sa sixth window ng 2023 FIBA World Cup Asian qualifier.

Sa pagkakataong ito, hindi makalalaro si Roger Pogoy ng Talk ’N Text matapos magtamo ng injury sa laban ng Tropang Giga at Meralco Bolts noong nakaraang linggo.

Hindi nakapaglaro si Pogoy noong Linggo sa laban ng TNT at San Miguel Beer.

“It’s not a severe sprain but he needs just a couple of weeks of non basketball activity,” ani Tropang Giga mentor Jojo Lastimosa.

Nauna nang nawala sa lineup sina Japeth Aguilar, Angelo Kouame at Kai Sotto na may magkaibang kadahilanan

Parehong may injury sina Aguilar at Kouame habang nagpaalam si Sotto na hindi muna ito maglalaro sa sixth window para paghandaan ang pagsabak nito sa NBA Summer League.

Kaya naman malaking dagok ito sa Gilas Pilipinas na kakasa sa dalawang laro sa Philippine Arena sa Bocaue, Bulacan.

Unang haharapin ng Pinoy squad ang Lebanon sa Pebrero 24 kasunod ang Jordan sa Pebrero 27.

Malaking kawalan si Pogoy na isa sa top scorer sa 2022-23 PBA Governors’ Cup.

Mayroon itong average na 20.0 points kada laro mula sa matikas na 51 percent shooting clip.

Nagtala pa ito ng 40 puntos nang ilampaso ng Tropang Giga ang Blackwater sa iskor na 138-116 bago magtamo ng injury kontra sa Bolts.

Magandang pagkakataon ang magiging break sa PBA para mapabilis ang paggaling ng injury ni Pogoy.