MANILA, Philippines — Kapwa bigo sina Kiefer Ravena at Bobby Ray, Parks Jr. na maihatid sa panalo ang kanilang mga koponan sa Japan B. League kahapon.
Tumipa si Ravena ng 14 points at 8 assists sa 88-99 pagyukod ng Shiga Lakerstars (6-4) kontra sa Chiba Jets (7-2) sa Funabashi Arena para sa kanilang ikalawang sunod na kamalasan.
Nailapit ni Ravena ang Shiga sa 86-91 agwat sa huling 2:32 minuto ng fourth quarter, ngunit nakawala ang Chiba patungo sa kanilang panalo.
Nalimitahan naman si Parks sa 8 markers sa 92-101 kabiguan ng Dolphins (5-5) kontra sa Gunma Crane Thunders (4-6) sa City Athletic Park Citizen’s Gymnasium.
Tumapos naman si Matt Aquino, anak ni PBA legend Marlou Aquino, na may 2 points at 4 rebounds sa 76-51 paggiba ng Shinshu Brave Warriors (6-4) sa Akita Northern Happinets (4-6).
Samantala, minalas si Javi Gomez de Liaño sa kanyang debut sa B.League nang makalasap ang Ibaraki Robots (1-9) ng 72-90 kabiguan sa Osaka Evessa (4-6) sa Ookini Arena Maishima kahapon.
May 3 markers si De Liaño sa 13 minutong paglalaro para sa Robots.
Naglalaro pa sina Thirdy Ravena ng San-en NeoPhoenix (3-6), Kobe Paras ng Niigata Albirex BB (2-7) at Dwight Ramos ng Toyama Grouses (1-8) habang isinusulat ito.