Maigi nang handa
MANILA, Philippines — Hindi pa man pormal na naikakasa ang laban, inihahanda na ni dating world champion Mikey Garcia ang magiging armas nito laban kay eight-division world champion Manny Pacquiao.
Patuloy ang pag-iingay ni Garcia na gigil na makuha ang karapatang makalaban si Pacquiao sa pagdepensa ng Pinoy champion sa kanyang World Boxing Association (WBA) welterweight belt.
Alam ni Garcia ang matinding labang haharapin nito laban sa isang legendary boxer gaya ni Pacquiao.
Kaya naman kailangang mapag-aralan ng husto ang magiging taktika nito sa oras na makaharap ang Pinoy pug.
Handa si Garcia. Mataas ang kumpiyansa nito na kaya nitong makipagsabayan sa bilis at tikas ni Pacquiao.
“I feel that I would be able to box and counterpunch, use my skills that way to try to make the fight in my favor,” ani Garcia sa Fight Hype.
Ayaw nitong magpakorner kay Pacquiao dahil posibleng ito ang maging mitsa ng kanyang pagkatalo.
Kabisado na ni Garcia ang galaw ni Pacquiao.
At walang puwang ang anumang pagkakamali kung ayaw nitong lumagapak sa kanyang mukha ang isang solidong suntok mula sa Pinoy bet.