Pacio pinasuko ang kapwa Pinoy, ONE strawweight kampeon pa din

MANILA, Philippines — Matagumpay na nadepensahan ni reigning ONE strawweight world champion Joshua Pacio ang kanyang ginto matapos i-tap-out ang kanyang kababayan, Biyernes.

Sa maagang yugto ng unang round, napabagsak ni Pacio si Rene Catalan na nauwi sa matinding palitan ng submission holds.

Nagkasubukan nang husto ang dalawa nang sabay nilang ilapat ang kani-kanilang pagyapos sa isa't isa, kung saan pareho silang tumangging sumuko.

Habang nasa canvass, pinuruhan ng suntok ni Pacio ang katunggali.

Natapos ang unang round matapos mabalibag ni Catalan ang kampeon sa pamamagitan ng fireman's carry.

Sa ikalawang round, nadali ni Joshua ang kalaban nang tuhurin sa mukha si Rene habang nakalingkis sa ulo.

Natapos ang laro matapos ihinto ang laban via submission sa pamamagitan ng arm triangle choke ni Pacio.

Tumagal lamang ng dalawang minuto at 29 segundo ng ikalawang round ang challenger.