Aces humirit sa Bolts

Magnolia pupuwesto na sa finals

Laro Ngayon(Smart Araneta Coliseum)

7 p.m. Magnolia vs Ginebra (Game 3, semis)

Mas mahigpit na depensa at agresibong opensa.

MANILA, Philippines — Ito ang ipinakita ng Alaska para balikan ang Meralco sa Game Two, 100-95 at itabla ang kanilang semifinals series para sa 2018  PBA Governor’s Cup kagabi sa MOA Arena sa Pasay City.

Tinapos ng Aces ang sinasakyang seven-game winning streak ng Bolts para sa 1-1 pagtatabla sa kanilang best-of-five semifinals duel.

Nauna nang tinalo ng Meralco ang Alaska, 97-92 sa Game One noong Lunes.

Nagtuwang sina import Mike Harris at guard Simon Enciso sa second period para ibigay sa Aces ang 47-40 bentahe sa halftime hanggang ibaon ang Bolts sa itinayong 19-point lead, 65-46 sa 5:33 minuto ng third quarter.

Ngunit sa pangunguna nina Nico Salva, import Alen Durham, Mike Tolomia, Chris Newsome at Baser Amer ay napababa ito ng Meralco sa 90-92 sa huling 50.9 segundo ng final canto.

Isinalpak naman ni Harris ang krusyal na jump shot para muling ilayo ang Alaska sa 94-90 sa huling 32.4 segundo habang ang three-pointer ni Newsome ang nagdikit sa Meralco sa 95-96 sa nalalabing 14.5 segundo

Ang apat na magkahiwalay na free throws nina JVee Casio at Enciso ang sumelyo sa panalo ng Aces.

Samantala, pupuntir­yahin ng Magnolia Hotshots ang pagwalis sa Barangay Ginbera Gin Kings sa Game Three ngayong alas-7 ng gabi para tuluyan nang pitasin ang tiket sa best-of-seven championship series ng season en­ding conference.

Muling magtutuos ang Magnolia at Ginebra sa Smart Araneta Coliseum.

Nauna nang tinalo ng Hotshots ang Gin Kings sa Game One, 106-98 at Game Two, 101-97  sa pa­ngunguna ni import Romeo Travis.